Snoukies Houkie deel 14

Gaidag, summige vruigen mie aal, woor blief de neiste “snouk”, man man man, k’heb t’drok man, wat denk’n ze wel, asof ik de heule dag agter mien tiepmasjien zit! T’is rustig op de veld’n, eerst aal snei, toun dikke vorst, dus gain voetball’n, dus ook gain röddels of leugn’s.

Teerste het wel voetbaalt, ain keer in Vee en Dam en ain keer in Stad, baide hem’n ze wonn’n, weer zes punt’n d’r bie en steeds digter bie ’t kampijoensgap. Ik zag die Meind bie’t Boshuus rondstrûûnn, soll’n ze doar ’t kampijoenschapsfeest holl’n, ik hoop’t nait, want dat is ja wel ain strontzoal en duur!!!!

Ik heurde dat ze teegn’woordig ook tiedens de kompetiesie gewoon op vakaansie mag’n as ze in teerste voetball’n, in Oostenriek hebb’n ze ain neie Tombalabomba zain, hei kon allain nait zo gout skie’n en was dikker as Tombalabomba, t’was oons aig’n Slimbalabimba, mit in zien kielzog, de witte Finse bliksemschicht, Arjaninen Norderminaïnnen, schandoalig dat ze gewoon tiedens de kompetisie op vakaansie kin’n, dat was vrouger wel aans, tog Loekie!

Asof niks is, A din krieg je B en en soam’n is dat Abee, nou Fre bedoul ik din, dei speult zug in de kieker in teerste heur, hei dut d’r wat veur, hei is bienao vartug, gait s’nachts aan t’waark, past alles aan en het alles dr veur over, en hei is aine van de beetr’n, hei is meroakel goud heur, klasse heur Fre, Loekie is wies mit zo aine, lot de rest doar moar eevn’n over noa denk’n.

Wel zug ik nait meer, ik heb hom nait meer zain, oons Maikel uut Wildervaank, of sol hai nog vast zitt’n agter de garagedeure, ik heb heurt dat dei moeiliek löss wil.

Lest las ik in de kraante, dat die Harriemienjonge, van ‘t daarde ook aan ’t biljart’n dut, dat is tog aan sport veur oalvandoagn, ’n beetje in de Spont of bie’t Kloosterheerd stöten, tog nait veur Harrie, hei kinn’t wel schier leuf ik, want hei zee dat hei kampijoen was van Grûnn, knap heur. Nou wie ’t tog over daarde hebb’n, ik heurde dat ze lest ain toneelstukkie hadd’n in ’t Streekje, doar waar’n drei man, dat iets mit kookers deed’n, ze hadd’n nait teveul kleer’n aan, ik heb begreep’n dat tleutjejong bienoa op’t podium hing, wat soll’n de vroulûû dat mooi hebb’n vond’n, t’stukkie was genoamd, “de Noorse Mannen”, nou volgend joar komm ik ook, dan krieg’n we volgens insaiders, wat ik heurt heb, “de Noorse Vrouwen”, de veurverkoop van volgend joar kin al starten, dat wordt mooi, ik zit veur aan.
Ooh joa, vreidagoavond, was ik te kiek’n bie ’t daarde op train’n, of de hessies binn’n te klain, of de pensen word’n dikker, ze spann’n dr om, ’t is gain gezicht.

Nou luu, ik kap d’r eerst mit, ik mot op tied op berre, want ik wil mörg’n bie teerste kiek’n, ze mott’n teegn Amasietijaa oet Stad, of zo, ik hol d’r reek’n mit dat ze weer drei punt’n pakk’n, hopeliek goan de jongens ook op tied op berre, alhoewel, d’r is ain piraat’n oavond in Voelhous, doar zal die jongste speuler, die Roy ook wel weez’n, hei was lest ook in t’ Streekje, verklaid as zien aanstoande schoonmoeke, zo vertol hei mie, k’heb heur nog nooit zain, moar din het hei wel ain schiere schoonmoeke, gelukkig nait as zien aanstoande schoonpa, dei kinn ik noameliek, dei is tog leeliek!

Snouk.

Comments are closed.